Carita Ranggalawe Gugur ing sandiwara iki dudu sejarah
nanging mung dongeng sing nyaritakake paraga Ranggalawe kang uripe tunggal
jaman karo Minakjingga lan Damarwulan. Dicritakake Ranggalawe menika Bupati Tuban. Nalika samana sing dadi ratu ing
Majapahit yaiku Ratu Tri Buana Tunggadewi utawa uga kasebut ratu Kencanawungu.
Saiki semaken caritane !
Adegan
1
(Ing pendhapa kadipaten Tuban, Ranggalawe lenggah kaadhep dening Sanggalangit
sing dipercaya dadi penasehat lan pujangga kadipaten)
Ranggalawe : “Paman, Paman Sanggalangit ...... yen sesuk
aku mati, aku titip Watangan lan Buntaran ya Paman.... reksanen lan jaganen ya
!”
Sanggalangit : “Nuwun sewu Kanjeng Adipati, panjenengan
sampun ngendika kados makaten, sampun damel ringkih manahipun piyambak.
Kekiyatan menika dumunung ing batos. Batos menika dumunungipun wonten ing raos.
Raos menika kedahipun dipunolah.
Ratu menika raos Kanjeng Adipati.... Sinten ingkang saged ngolah raos, temtu
mangkenipun dados ratu.”
Ranggalawe :
“Oh... ngono Paman?” Aku mengko bakal bisa dadi ratu, Paman?” Wah, Paman bisa ngramal,
ora rugi aku duwe pujangga Sanggalangit.
Sanggalangit : “ Inggih...inggih Kanjeng Adipati,
sambotenipun saged dados ratuning diri pribadi. Pramila sampun ngantos sumelang
mangke Paman ingkang badhe bebela, panjenengan mangke badhe nampi bintang
minangka tumbal kusumaning negara.”
Ranggalawe : “Ya Paman, uripku bakal dadi tumbal
kusumaning negara. Aku mantep nindakake dhawuhing ratu Kencana Wungu kanggo
nyekel Adipati Blambangan Minakjingga kang mbalela mbuh urip utawa mati.
Dherekna aku ya Paman, sing prayitna!’
Sanggalangit : “Mangga, mangga Kanjeng Adipati.”
(Ranggalawe mapag lakune Adipati Blambangan sing lagi gawe
ontran-ontran ing wilayah Majapahit amarga kepengin dadi ratu Majapahit lan
nggarwa Dyah Ayu Kencana Wungu. Minakjingga didherekake Dayun abdi kinasihe).
Ranggalawe :
“Minakjingga! Ayo, papagna kridhaku, iki Senapati Majapahit kang bakal nugel gulumu
Minakjingga!”
Minakjingga :
“Oh, Paman Ranggalawe...sungkem pangabekti kawula katur Paman.”
Ranggalawe :
“Isih jangkep trapsilamu? Ora gendheng ta, sukur isih waras !”
Minakjingga :
“Taksih Paman, kula mboten gendheng. Waras, sehat, taksih ngertos sopan santun...alah
hiyung-hiyung.”
Ranggalawe :
“Minakjingga, apa bener kowe dhakah-dhakah kepengin dadi ratu?
Minakjingga :
“Kula nagih janji Paman, lelabuhan kula ing Majapahit sampun ageng. Ingkang mboten gadhah
lelabuhan mawon saged nangkring, mukti wibawa...menapa kula lepat Paman?”
Ranggalawe : “Dadi ratu ngono ora gampang Minakjingga, apa
maneh caramu iki wis gawe
sengsarane kawula sing ora ngerti dosa, padha kokpidana,
koklebokake ing pakunjaran,
koksiksa, yen perlu kokpateni. Apa kuwi patrape manungsa?”
Minakjingga :
“Tiyang-tiyang ingkang dados korban menika, ingkang ngalang-alangi kula. Upami tiyang-tiyang
kala wau sami nyengkuyung kula, temtu mboten dados korban malah kepara
mulya gesangipun Paman. Pokoke yen rewel, mbanggel...kek....dhet !”
Ranggalawe :
“Lha yen sing ngalang-alangi aku, arep apa Minakjingga...arep kokpateni ya?”
Minakjingga :
“Adhuh Paman Ranggalawe, mugi kula kapejahan kemawon Paman!”
Ranggalawe :
“Yen bisa dakelingake, wurungna anggonmu kepengin dadi ratu ing Majapahit lan kepengin
nggarwa Dyah Ayu Kencana Wungu. Selehna kabeh ubarampe perangmu, ayo sowan Majapahit, mengko aku sing bakal nyuwunake pangapura
marang ratu Dyah Ayu Kencana Wungu.
Minakjingga : “Adhuh...adhuh mbek
meyong, mbek kethekur...adhuh ayune...suwunaken tresnanipun Dyah
Ayu Kencana Wungu mawon Paman,
kula kepengin dhaup...kula mboten
lepat.”
Ranggalawe :
“Minakjinggo, kowe rumangsa ora luput ?”
Minakjingga :
“Mboten Paman, saestu mboten.”
Ranggalawe :
“Dasar dudu wataking
manungsa, yen ora
budheg kupingmu....mripatmu weruh...mesthi
ngerti sapa aku ?”
Minakjingga :
“Ngertos, panjenengan Paman Ranggalawe ta ?”
Ranggalawe :
“Keparat ! Wani kowe karo aku ?”
Minakjingga :
“Kadhung ambyur, rawe-rawe rantas malang-malang putung!”
Ranggalawe :
“Bocah murang tata, saiki adhepana aku !”
Minakjingga : “Alah
hiyung-hiyung.....adhuh
Paman...... Menapa paman
kesupen nalika semanten nate
ngendikan? “He Minakjingga ya sing aran Jaka Umbaran, mbesuk kalamun
menang perang tandhing mungsuh Kebomarcuet, bakal gedhe ganjarane. Ora esuk
ora sore.....klakon dhaup karo Dyah Ayu Kencana Wungu ratu Majapait.
Sampeyan sampun ngapusi Paman... Punggawa praja kok leda-lede...kaya tempe
bosok!”
Ranggalawe :
“Embuh, ora idhep! Pokoke aku ora sarujuk yen kowe kepengin dhaup karo Dyah Ayu Kencana
Wungu...titik! Eling Minakjingga, ngilo... ngaca yen rupamu morak-marik kaya
celengan peyot, ngerti?”
Minakjingga :
“Alah ...hiyung-hiyung....cethanipun Paman ngina kalih kula!”
Ranggalawe :
“Pancen ya elek tenan, arep bukti ? Coba takonana abdi kinasihmu kae !”
Minakjingga :
“Dayun....Dayun.....coba sowana mrene Dayun, ingsun arep takon, wangsulana sing jujur, aja
goroh!”
Dayun :
“Wonten napa lurahe? Undang-undang, gemboran, mbudhegi wong melek.”
Minakjingga :
“Miturut kowe, rupaku bagus ta Yun?”
Dayun :
“Nggih lurahe, nggantheng sanget kados celengan.”
Minakjingga : “Hus, Dayun.!” Aja kesuwen Dayun, jupukna
pusakaku sing aran Gada Wesi Kuning kanggo ngepruk
sirahe Ranggalawe kareben
ajur kumur-kumur Dayun...!”
Dayun :
“Nggih kula pendhetaken lurahe.
Minakjingga :
“Cepet...aja kesuwen Dayun!”
Dayun :
“Inggih gusti...niki pusakane lurahe.”
Ranggalawe :
“Ha ha ha ha... He Minakjingga, endi piyandelmu... jare pusaka Gada Wesi Kuning ampuh, coba
tamakna aku! Iki senapati Majapahit, ora
bakal mundur sajangkah
lan ora bakal tinggal glanggang colong playu...enggal tamakna aku!”
Minakjingga :
“Hiyung-hiyung...mbek meyong mbek kethekur, yen pancen Paman bosen urip, niki Paman Ranggalawe...klakon
dak kepruk sirahmu, dadi glangsaran kwandhamu!”
Pranyata ampuh tenan kasektene Gada Wesi Kuning, Adipati Tuban sing kawentar sekti mandraguna tiba glangsaran sawise mustakane dikepruk nganggo pusaka Gada Wesi Kuning. Ranggalawe gugur. Minakjingga gilang gumuyu karo sumbar yen ora bakal ana satria sing bisa nandhingi kasektene. Dyah Ayu Kencana Wungu bakal dadi garwane. Minakjingga ora ngerti yen ing papan liyane ana trubusane satria sekti mandraguna sing bakal ngethok gulune yaiku satria sing asmane Damarwulan.
