Crita
wayang iku asale saka India. Babone crita yang kui ana loro, yaiku buku
Ramayana lan Mahabharata. Buku Ramayana nyritakake lelakone Prabu Rama lan
Shinta. Buku Mahabharata nyritakake lelakone keturunan Bharata, yaiku perange
antara pandhawa lan kurawa (Pandawa 5). Saka tanah India crita wayang mau digawa dening
para pedagang sing menyang tanah Jawa. Sawise tekan tanah Jawa, crita mau
banjur dikarang maneh dadi lakon kang maneka warna. Salah sawijining
crita wayang Ramayane nduwe lakon Jatayu. Jatayu kui rajane peksi, dheweke mitra cakete Prabu Dasarata (ramane
Dewi Sinta).
Dicritakake
ana ing siji dina, Jatayu weruh Dewi Sinta dicidra dening Rahwana, dheweke
enggal mitulungi. Jatayu mabur ing nggegana ngrebut Sinta saka tangane Rahwana,
dedreg undreg-undregan, silih ungkih rebutan Sinta ing nggegana. Emane, Jatayu
kalindhih, ditatoni lan diajar dening Rahwana, nganthi swiwi kiwane sengkleh
lan tugel. Rahwana bablas mlayu gegana angglandhang Dewi Sinta kang tyerus
sesambat tangis.
Tumekane negara Alengka, Sintha dipameri kaendhahane Kraton Alengka Diraja kang sarwa kemelap, warna-warni rerenggan saka mas, inten lan berlian. Ananging dewi Sinta ora gumun lan ora kengguh, Rahwana bola-bali ngerih-rih sarta nglipur Sinta supaya gelem digarwa, nanging Sinta ora bisa nglalekake prasetyane marang Rama. Rahwana kuciwa banjung ngutus Trijata supaya ngereh-reh atine Sinta.
Ing
satengahe alas banjur Rama bali menyang papan nalika ninggal Dewi Sinta. Tekan
papan panggonane, Sinta ora ana. Rama nemokake kembang, cundhuk mentul lan
panganggone Sinta pating pececer. Banjur Rama lan Lasmana nggolekki Sinta ning
ora ketemu. Rama nesu banget nganti jagad sak isine arep dijungkir walik.
Nalika
nggolekki Dewi Sinta, banjur Rama lan Lesmana ketemu dening Jatayu kang lagi
megap-megap ing tengah alas banjur crita yen Sinta diboyong dening Rahwana
menyang Ngalengka. Durung rampung anggone crita Jatayu banjur mati. Rama lan
Lasmana nerusake lumakune.
Nalika
ing tengah alas dheweke ketemu dening rajane wanara yaiku Narpati Sugriwa.
Sugriwa gelem menehi pambiyantu Rama kanggo nggoleki Sinta anggere dheweke
njaluk direwangi kanggo nglawan kangmase Subali. Sugriwa ditudhung saka negara
Kiskendha, banjur negarane direbut dening Subali. Merga kuwi dheweke pengin
njaluk bali negarane maneh. Merga direwangi dening Rama banjur Sugriwa isa bali
ngrebut negarane lan ngalahake Subali.
Ing negara Kiskendha ana wanara kang sakti mandraguna, wicaksana lan trampil kang arane Anoman. Rewanda putih iki banjur mbiyantu Rama kanggo ngrebut Dewi Sinta saka Rahwana. Banjur anoman lan wadyabala wanara liyane mlebu metu alas nggoleki Dewi Sinta. Ing tengah dalan dheweke ketemu dening peksi Sampati (sedulure Jatayu). Sampati nyritaake yen dheweke weruh Rahwana nggawa Sinta menyang Ngalengka. Banjur Sampati menehi ngerti dalan menyang Negari Ngalengka.
Satekane Ngalengka Anoman banjur mlebu menyang Taman Soka lan ketemu dening Dewi Sinta. Anoman banjur crita yen dheweke kuwi utusane Rama. Ning apese Anoman konangan dening Rahwana. Anoman banjur diukum obong. Merga Anoman kuwi sekti mandraguna dheweke ora kobong lan sing kobong namung buntute. Banjur Amonan ngipat-ngipatke buntute neng sakubenging Negari Ngalengka nganti dadi kobong gedhe.
0 komentar:
Posting Komentar